新年快樂2006

今日係倒數的大日子, 在此恭祝各位朋友身體健康!!!心想事成 !!! 橫財就手!!! 事事亨通!!!

狂飲的一夜

Merry X'mas!!!
今日原定大家一齊係中環飲下野啫, 點知講下講下就join左個同事既同事攪既party, 個度可以任飲任跳(當然要入場費), 大家本住"返本"既關係, 就係咁嗌酒飲, 飲到亂七八糟, 起初都係cocktail啫, 跟住吾知點解係要大家齊齊飲tequila, 以我記憶好似飲左七八杯tequila再加好幾杯gin tonic呀, rum coke等等.....臨尾個水吧好似冇晒tequila添呀....玩下玩下到三點幾就走啦....我未至於大醉, 但好多野都吾記得囉~最緊要係我仲識返屋企....

要倒前返party前, 我地係尖沙咀遊盪左一陣, 我既暴食症又出現, 首先出門前我係屋企巳經食左少少野, 到尖沙咀再食魚蛋粉, 然後好想食麥當奴雞翼, 又食左, 之後又好懷念肯德基d巴辣香雞翼, 講下講下又食左, 仲食多左件雞胸肉添....到個一刻先覺飽囉....!!!

好耐冇聽啦......

為左配合各方的schedule, 我地今日先食"冬至飯"!!
年幾兩年前好鍾意聽日文歌, 之後吾知咩事冇聽都冇買碟, 今日係唱片舖盪下盪下, 買左兩隻精選碟: 平井堅同埋中島美嘉!!!! 平井堅把聲勁好聽!!!
經過一個下午既搜尋, 終於掌握左新年各大日本百貨公司既開店時間同優惠, 亦諗好四天既路徑圖, 忍吾住都係買左本最新既旅遊書!!!

早到的雙糧

原來呢間公司係冬至前會出雙糧俾大家過聖誕, (我一直以為係農曆年前), 所以今日打簿仔, 見到$$, 真係好開心呀, 咁我下個月既購物團就....嘩哈哈呀!!!!

L.A.

記得上次做LA機巳經係一年前既事啦, 竟然宜家一日三班都冇我份, 佢地話我真係好彩, 宜家連酒店都換埋, 住得好近Disneyland!!! 其實我麻麻地迪士尼, 不過原先諗住有人去都會join埋一齊, 但最後係"零", 不過都吾緊要, 因為我可以係downtown disney 行下, 又可以買souvenir; 而且係酒店都睇到煙花架, 個晚我地一齊係crew lounge食飯(又係食thai food!!!), 熄晒燈好好氣氛架, 一邊睇煙花, 一邊"嘩嘩嘩"囉, 好似"包廂"咁....都幾開心喎!!!!!

今趟機遇上個"星座小王子", 又"撩"起大家一齊討論星座, 好攪笑喎!!!! 我都知自己係一個幾固執既人= 人馬+雙子

大煲翅&燕窩

今日做一班叫做long stay bangkok既機, 雖然真係幾tough, 但去到點到要出去行街食下野啦!!
其實自己冇諗過要去bangkok旅行, 因為我覺得bangkok係陽光與海灘既地方, 吾係咁o岩我, 但經過今役之後, 我諗即使吾玩水, 剩係過來食野行街"揼"骨都幾開心!!!

我地一到酒店換好衫, 就"嘭嘭聲"搭的士出siam, 由於我地實在太肚餓, 但又要留個肚今晚勁擦喎, 所以沿途不斷咁食小食, 我個串串燒豬都好好食呀, 仲有七彩多士呢.....行完一大餐, 就再搭車去china town食晚飯, bangkok ｄ交通真係有ｄ混亂, 仲有d的士司機真係好衰呀, 成日都吾用咪錶, 又拒載, 搵的士不知浪費左我地幾多時間!!!

係bangkok食野真係超抵又好味, 首先我地去左大排檔勁擦, 四個人不知不覺都嗌左吾少野, 包括: 大煲翅, 燒蝦, 蝦刺身, 炒通菜, 咖喱炒蟹, 冬蔭功, 椰青......咁勁食法都不過係一人一百元港幣都吾駛; 跟住過"南星"食燕窩, 我點左個"人參燕窩", 雖然同餐飯差不多價錢, 但佢真係好足料喎, 好味!!! 仲有佢杯菊花水都好好味.....臨走前, 我地仲去左附近"林真香"掃貨, 真係同旅行冇乜分別!!!!

聖誕過後, 我會再做呢班機, 吾知到時有冇人同我一齊癲呢?!

中華料理

今晚約左嶺南同學仔食飯, 去左尖沙咀一間店食"中華料理", 可能新開既關係, 所以成晚都冇乜人, 全場得一個待應生, 好似好悶咁!! 由於呢度食既都係一小碟一小碟, 好似食極都吾會飽個種, 最後我諗我地嗌左七八輪左右先攪掂餐飯啦!!!!

P.S. 最近聽janice隻碟, 覺得好好聽, 尤其係"一場誤會"!!

JOHANNESBURG

8th~12th DEC 天氣: 日晴/夜寒
第一次去joburg, 一心諗住去lion park, 去safari, 去騎馬仔, 但因為吾夠人既關係, 結果吾成團, 但都超級開心, 因為今set crew個個都好好人,個個都係"百科全書",個個都超爆笑, 即使冇dvd既陪伴, 好快好開心咁就過左去啦...!!!

• 由於去個程好light loading, 所以大家都好輕鬆!!
• 去到joburg瞓左一陣, 就同大家去mall行街, 不過真係冇咩行囉, 今次我買返屋企既野, 只係一支peri-peri辣椒醬!!!
• 夜晚我地成set crew約好一齊係酒店玩bbq, 我都係第一次係outport bbq咋, 都幾開心, 因為個環境好似係人地屋企個花園咁, 好外國feel!!!
• 除左食, "飲"當然係吾少得啦, 其實我麻麻地得紅酒, 不過經過今役之後, 我開始okay佢啦!! 都要多得阿哥教我地飲, 教我地去欣賞,品嚐紅酒, 佢買左好多不同種類, 不同價格既酒, 係咁叫我地試下啦, 試下啦!!!
• 我好記得阿哥話" 係一頓fine dining入面, 紅酒有一個好重大既角色, 由於每一支紅酒都係有吾同既history: 年份, 葡萄, 天氣, 產地.....佢就好似記錄左當年既事情, 當你宜家可能飲一支2003年酒, 其實就好似同朋友回憶or回味緊03年既事咁, 飲紅酒係朋友之間既一種SHARING !!!! "
• 佢地個個係咁講笑料, 真係笑到我個咀"梗"晒!!!
• 第二天下午我同helen就係酒店食tea, 一坐又幾個鐘, 之後又同大家一齊去左sandton食"肉", 由於我吾食羊呀, 牛呀.....最終係冇雞既情況下, 食魚!!! 又係一餐fine dining!!!!!!!!!
• 後記: 有時我覺得crew同crew既關係都幾得意, 大家可能相處左只不過十個鐘, 但大家好似識左好耐咁, 無所不談, 會同大家分享自己既過去, 所謂"互相學習"!!!!

十二月之星

今日係我地十二月之星既聚會, 當然要食下野, 傾下計啦.......雖然好簡單既一頓飯, 但都好開心呀, 好開心同你地傾計既時間......我每次點都有d得著架.....!!!

祝大家身體健康, 幸福快樂!!!!!

火煱大會

天氣急凍, 最好就係打邊爐.....每當諗吾到食咩既時候, 我最鍾意就係打邊爐, 所以一年四季我都好得佢!!!今日我地吾係街舖打, 轉移去左julie屋企, 係人地屋企打都好開心呀, 大家可以一邊睇電視, 一邊烚下烚下, 最感動係佢有anutie攪掂晒, 飯後仲有果盤, 我好耐冇食過"批"好皮既蘋果呀.....!!!! 味道真係有分別架....

P.S. Michelle, 多謝你送給我個個hand-made電話套!!!!! 大家都睇得出個個係melody!!
Julie, 多謝你送我既dior毛巾pouch!!! 驚弄髒, 吾捨得用呀...!!!

考試

今日一早就去考能力試, 今年好彩有vivien陪我一齊, 所以冇咁悶, 我地二人都超輕鬆, 真係本著"吾識咪吾識囉"既心態, 不過我地都儘力做架啦, 結果係點都要接受.....考完之後一身輕, 不過呢排真係好攰好吾舒服囉.....所以請左假....

p.s. 聽到vivien話如果今年有double pay 既話, 就會今個月出俾我地, 真係開心, 希望有啦!!!

多謝多謝!!!

多謝各方好友既祝福和禮物, 人可能真係開始大, 覺得生日巳經吾係咩野大事, 大家就咁食下飯, 傾下計巳經好okay啦.....不過願望就仲有一大堆既.......
thank you...!!

期待的一天

今日做完班colombo返香港就打俾你啦...我當然吾會吾記得我地既約會啦....!!!!
我地終於成功左, 去做左我地講左好耐既事....哈哈!!!! 其實我都吾敢係度講咁多, 不過都會記得囉, 多謝你整齊既筆記, 我會盡快整理好再俾你架啦.....
宜家好似"晴明"得多(我吾知點形容...)
好簡單既總結: 我相信機會處處都有, 我又知道自己既弱點,
我要轉危為"機"...., 我吾信自己係二奶命.....哈哈!!!!
大家加油呀!!!

畢業照

好耐冇試過咁早起身, 因為今日要到poly同cherrie & jacqueline影畢業相, 順便早少少去玩具反斗城買個d玩具花, 佢年年都有出吾同既玩具花, 上年有向口葵or哈哈笑花, 今年有玫瑰花, 個樣都好okay喎, 佢有鮮紅色,藍色及粉紅色, 我諗藍色奇怪左少少, 紅色影出來既效果會最好啦......

今日又曬又熱, 不過咁好天氣, 影相就最好不過........吾知係咪曬得滯, 一坐底就好攰好眼瞓....!!!!

Paris 後記

21~25 nov/paris/sunny/4~7 oC

五日pattern既paris, 真係吾多時間用, 其實大約係個邊整整兩日, 又要shopping又要sight-seeing; 去之前都聽d crew講要小心小心, 個邊d治安都係差, 連酒店都係吾掂, 所以d錢呀証件又係左一d右一d......

• 1st day 係購物日, 去左lafeyette行街, 都幾多野睇喎, 不過都係買化妝品多.....宜家d euro咁低, 其實都抵買既....
• 2nd day係好忙既一日,一早我地就去左neon食mussels, 好好味都好抵食.....由starter開始食食食....食到dessert.....又係食全餐!!
• 之後就上左凱旋門睇巴黎全景, 不過好大霧, 所以鐵塔都吾係睇得好清楚......但個view都係好okay個種.....下次有時間先再去羅浮宮及鐵塔!
• 飯後我地去左香舎麗舎大道個間LV shopping, 但就吾係門口成個"LV隐"個間, 不過呢間都好大, 係paris買都幾平, 退稅有成12%咁多, 我都完成左我既任務, 仲退埋稅添.....
• 完左LV, 又去左睇Gucci, 吾小心買左個pouch......haha.....
• 由於我落機個陣吾記得帶走個化妝袋, 所以要額外破費買返d makeup.....好慘...
• 日落時份, 我地去左聖母院, 入面好大樓底好高, 係好靚喎, 尤其係d玻璃畫(我吾知係咪咁叫....), 每一個圖都係一個故事, 可惜不能拍照......
• 係我地差不多到機場既時候, 發生一段小插曲. 就係見到附近有好多警車救護車消防車, 某一段路仲block左, 所以我地都塞左係度, 原來機場內有一件長久冇人認領既行李, 因此當作為可疑物品處理, 要封鎖某部份機場範圍以爆破個件行李, 個司機話係好常見既事情,差不多每日都會發生,每次至少要攪三十分鐘, 好彩我地都趕及去detax.
• 總結: paris吾係吾靚, 不過個人喜好, 我鍾意rome多好多....

Tweeny 的囍宴

今日除左係台慶之外, 仲係tweeny結婚既大日子, 恭囍恭囍!!!!! 由於係酒店攪, 所以上菜既時候, 就有人分好晒一份份, 係衞生d既, 不過我都係鍾意大家一齊夾下夾下飲杯個種感覺!!!

p.s. 遲d一定要去你新居開party呀, 勁飲勁食!!
p.s.s. 仲要講返個晚d笑料俾你聽!!!!

friday night --> 剝花生

今晚friday night, 我地三個美少女再加上一個要"放盤"既俊男nathan(好耐冇見!!), 再加上毛毛既friends, 去左cwb剝花生, 由於我實在係忍吾到口, 不停不停咁食花生, 足足要飲兩大杯hoegarden先得, 個度都吾知有冇1.5l !!!!

飲野之前, 我同毛毛仲去左好耐冇去既"時時樂"剧扒, 好熱氣不過好好味!!!!

真係中左.....taipei long stay

之前standby都係做d極短速既機, last呢兩日真係好希望用一個long stay taipei攪掂埋佢, 點知真係中左, call左做班450.....真係開心到暈, 因為好耐好耐冇stay過係taipei, 好耐冇食過街邊野啦!!! 加上又好想好想好想行書局啦, 又好想好想買個隻yoghurt......通通都實現左!!!!!

我有我的ipod nano

其實仲有成個月先到生日, 但我巳經買左份禮物俾自己(根本係藉口!!!!), 就係ipod nano!!!! 我想換個件mp3好耐, 但都吾係好o岩心水, 某日朋友借俾我睇佢個ipod nano, 真係好靚仔呀!!! 又薄!!!! 好鍾意, 所以先訂ipod nano送俾自己!!!! 今日終於收到啦!!! 你估我會買咩色???

Apple果然係Apple, 都係講design, 出名靚喎, 我呢個白痴真係"舞"左一輪個sw, 先知佢做緊咩....部機入面既function都好好, auto幫我sort個playlist, 真係好鬼醒!!! 仲有好多野可以攪, 但我就未去理囉, "查實"今日我係standby架......成大半日都係度玩, 野都未執!!

好準時, 四點開始standby就四點打俾我, 原定明天去bangkok轉左去manlia, 都好呀, 一來多d $ 多d 鐘, 加上星期日一朝早就返, 仲俾我放埋星期一, 又賺左!!!!!

哥哥的大事

今日係哥哥結婚註冊既大日子, 我地一家好早就起身赴會啦!! 由於我始終買吾到合適既衣服, 所以最後盡我所能, 著到最好架啦!!! 今日天氣晴朗, 加上有少少風...., 不過我哥都係汗流浹背!!!(佢好似有修身過o黎.....)一早去到, 都係周圍影下相, 然後等入禮堂註冊; 一如所有新娘一樣, 我"大嫂"宣讀誓詞既時候都係"喊"既, 不過好快收拾再讀下去.......我的爸媽都相當高興呀....

明天佢地就會去東京渡蜜月啦, 玩得開心d呀,買多d手信俾我呀!!!!!

人老了.....

今日終於同阿強&老麥食個餐"洗塵"飯, 雖然好似遲左少少, 但總算完成左嘛, 應承左架嘛.....
下年一月一日開始放leave, 心想要去一轉東京啦...反正很久冇去, 又未試過係東京過新年嘛...自己要開心下嘛.....所以開始留意緊d package 啦.....
為左揀張相post上msn, 不經意睇返兩年前係日本影d相, 發覺自己老左好多, 吾知係髮型關係(個陣"留海"架?!)or 其它野, 個陣個樣都精神得多....好驚呀.....兩年o者.......好似老左好多咁.......

我有我的photo album

今日執下執下自己的相, 原來真係有好多好多呀, 有時有d好無聊但好想分享既相架嘛, 但又好難放咁多係blog呢度, 加上為自己做個backup, 好悠閒咁又攪個photo album出來....哈哈!!!!

http://hk.pg.photos.yahoo.com/ph/sakurara_photo/my_photos

shopping day

闊別多天, 堆積左一堆要買可不買的東西, 所以今天又係我既shopping day.....當中包括左"十一月的蕭邦"隻碟, 之前聽"夜曲"都覺得好okay, 加上要集齊佢d碟嘛, 所以係要買, 入面d相影得好靚, 吾知係邊度影既呢.....? 今日仲買左個條exercise band, 呢條野係我aeq時個repesentitive介紹既, 我覺得幾好喎, 閒時一邊睇電視, 一邊可以做; 加上個size好細好portable, 帶埋去outport都得!!!

完左八二八之後, 我有五天day off, 好似好長, 但我有好多野想做, 首要既係溫書啦, 收到張exam voucher, d壓力又出來啦, 而我既準備又真係未ready, 要開turbo啦!!! 另外, 好想去剝花生!!!

Niagara Falls

來到多倫多, 我地四個都冇人冇物, 大家又係一個目標->去睇niagara falls!!!!!!!!!!!!!
之前都係聽說個邊有d超平既casino團+niagara falls, 係我地亂打亂闖之下, 就上左個架車出發去啦....其實個團真係好抵, 只不過係加幣廿五蚊, 當中有廿蚊你係可以係casino換籌碼, 又或者即刻換返現金, 實質只係付出五蚊, 就可以去睇niagara falls啦.....!!!!!

我地都幾黑仔, 係alaska睇吾到冰川, 係機度又撞吾o岩有北極光, 睇niagara falls個日又落雨, 所以睇吾真佢既全景, 不過我都覺得好勁, 個種震撼吾識形容, 加上我又怕水呢...個水勢真係驚架~如果下一次再做呢班機, 我到會再來, 我想睇晴天既niagara falls, 同埋試下搭船仔.....

冰天雪地

今日又展開一段漫長既旅程, 係呢七日內由香港->阿拉斯加->多倫多->阿拉斯加->香港, 我都係第一次做呢個pattern, 呢個比"奪命八八八"好好多, 不過阿拉斯加真係凍到變冰條, 宜家就負十幾度, 到年尾或一月時真係吾敢想像.

連我同其餘三位同事都係第一次來, 所以一抵步, 我地集齊人馬準備搵tour勇闖冰川, 可惜不合時宜, 剛巧個日冇團, 只得一d較昂貴既helicopter團, 最後冇冰川, 唯有行街啦, 係阿拉斯加買野食野係免稅既, 所以買野又係超開心, 雖然個mall吾大吾多野行, 但仲有gap呀..a&f呀...banana republic等等頂住, 梗執到一兩件既......

由於太凍既關係, 我地都係出街食一餐, 另一餐就係食杯麵; 而我又吾食蟹, 所以都冇試當地最出名既長腳蟹; 不過有一餐食korean food, 真係超級好味, 個個豆腐湯真係滑到吾識講, 返到香港之後勁掛住囉~

p.s. 遠望個雪山時, 我覺得好假架...好似d礦泉水上面個d雪山咁.....

AEQ 05

廿四至廿六呢三天, 係一年一次既emergency review, 今次冇classmate一起, 得我一個人上呢個training, 除了每朝早起及考試之外,比我想像中好好多, 而且trainer又好, 所以好順利就pass左啦!!
其實呢個training都好有用, 可以refresh & update一下自己, 完左呢個training之後,真係覺得每一個part都好重要!!! 仲要臨危不亂.....

少女的聚會

今日係三個少女既聚會, 地點係"豐"日本料理, 都幾好喎~坐下坐下可以坐到十一點喎......
大家工作和情場(愛情?)上都遇到問題, 畢竟都係我地呢個年紀會遇到既問題.....好煩哦!!! 所以我同你都決定交由別人去批判........->好攪笑都好期待.....!!!!

好疲倦

很久沒有上日文課, 今早一起身就趕緊要做功課, 仲有作文.....起初真係吾知點開始, 不過左翻下書, 右翻下筆記, 就完成左我篇作法!!! 作文真係不錯, 所以幫助我記下詞語, 仲有重溫一下d文化, 遲d我要開一個日文日記先......

之後, 自己一個慢遊左一陣, 因為要等埋佢地收工飲野......而tweeny今日都發貼呀, 恭囍恭囍!!! 飲野後記: 工作同愛情都係惱人既.......

p.s. 我同edith既計劃又邁進一大步, 好緊張十一月既來臨!!!!

SFO again!!!

十月十五日至十九日 天晴 勁熱
好開心今個月又有sanfran flight....又一個駛錢既地方,忍吾住又買牛仔褲, 又狂食野....所以感覺好似肥左好多.....同時, d同事都好好, 仲認識左阿"dee后"同"懶數皇"呀(還有超好人,早走既rachel)!!! 個晚玩到超爆笑, 個個都high high地, 一世都吾會忘記個支勁難飲既pina colada.......以後飲野都吾會飲呢個......

正宗laksa

昨晚成兩點先瞓, 今日仲要晨早做一班幾tough既機, 其實都有少少"x抵",不過死就死啦......吾可以port sick架, 我張trump card就快到手架啦!!!!! hahaha......wait for that...and go to ROME again~ 最終兩個sector都好順利, 而阿哥真係超級超級超級大好人, 係我地transit期間, 佢幫我地order sin food!!!! 又可以食到laksa啦!!!! 真係超級開心, 地道果然吾同d, 真係好好味, 相比我係perth china town(其實都好味架~)食個碗真係無頂, 個個湯底真係頂呱呱, 個麵底真係正宗個d....價錢只不過係hk$13!!!!!! 嘩嘩嘩!!! 抵到爛!!!! 下次有機會要買多幾碗返屋企先!!!!!

P.S. 其實點會瘦左呢, 無論係outport係屋企係香港...即使transit之嘛....我都係勁食密密食!!! 潛在既壓力真係咁大?!

Karaoke Party

今日補祝christine既生日, 我地一羣人決定去唱k!!!!! 係我心目中, 一年四季都可以打邊爐既, 永遠都係我既first choice!!!! 係neway個buffet度, 我覺得個小火焗最好味!!!!! 宜家唱k冇以前咁密, 好多新歌都跟吾"徹"呀....大家既工作好像很繁忙, 看似我最無聊得閒, 係時候我要搵d新野攪......

收到edith既電話, 令我好緊張, 因為今次成數高d...個plan轉移返香港喎~我會well prepare gar lar!!

柏斯, 我又來啦.....

係澳洲port當中, 我最愛係柏斯, 人人話佢悶, 我又吾覺得呀....佢真的不及悉尼咁繁榮, 但佢寧靜中都帶點繁榮架....風景又幽美, 又有街行.....好地方一個!!! 養病都係一流!! 而且今次仲要同我classmate AMY飛, 仲要做埋同一個galley, 真係十萬個難得!!!!! 我地原定諗住join tour, 但個個tour有d地方吾o岩玩, 攪左一輪之後, 個兩日我地都係city行街嘆茶!!!!!

其實我地兩個都相當"擦"得: 第一日/三四點先食個laksa再加Chips&Fish, 六點半又join埋其它crew一齊食飯, 兩個口講話陪坐食少少, 點知又叫steak又叫三文魚. 第二日仲離譜/兩點食laksa(我地都係laksa狂!!),之後有d累, 坐低食大件cheesecake加 coffee, 又話夜晚吾食, 點知又勁食, 不過呢餐勁好味, d蠔超級新鮮好味(我地又有discount呢)再加上一杯champagne, 冇得頂!! 主菜crayfish risotto都勁好味, 係香港真係好難搵到又平又好味又新鮮既dish!!!!

兩晚都有幸同一位FO食飯, 大家都無所不談, 好攪笑!!!!

靜坐四個半小時

今日終於可以整頭髮啦.......我想整好耐啦....就去左朋友M既朋友做個間salon整, 間野原來來頭不少（某大集團既ｙｏｕｎｇ　ｌｉｎｅ）, 點知有咖啡茶又可以睇dｖｄ, 不過我選擇睇雜誌, 因為我都實在好耐冇買過來睇.....其實今次都係想電翻個頭, 經過上一次既曲髮後, 今次可以電得強勁少少, 我應該可以接受到既....個stylist都幾勁, 未電之前佢幫我剪左個頭先, 真係好okay喎, 剪到d頭髮又直又"伏"又stylish!! 其實除左電髮之外, 當中仲有直髮啦...treatment啦......所以攪左好耐....坐足四個半鐘呀.....!!!!!

BAHRAIN都幾得意喎.....

繼杜拜之後, 巴林係我踏足中東既第二個PORT, 起初真係吾知呢個咩地方, 感覺冇杜拜咁先進, 又好似冇乜人話來呢度, 加上個邊D野食真係吾係好O岩我......實際上都好OKAY呀, 個機場都吾細呀, 仲有好多油長添呀....人地話睇佢地頭巾上個個圏就知佢地既地位有幾高; 而個邊D女人好多都係穿黑紗, 仲要係包住全身剩低對眼個種, 好神秘......

係巴林都冇得SIGHT-SEEING, 不過個邊D BUILDING都幾得意, 全部都矮矮白白, 好整潔; 如果鍾意曬太陽既就好OKAY, 因為曬到暈......;係個邊買NUTS啦, 香料啦都好平呀, 連食野都好平, 我就係個邊試左菲律賓餐同意大利餐.....都OKAY喎~

係個邊冇咩做, 好悠閒, 個病都養好埋.....

我愛TAIPEI FLIGHT

今日國慶日, 大家放假, 但我就要做一班TAIPEI TURNAROUND.....冇所謂啦, 反正我又吾好睇煙花.....以前我好討厭做TAIPEI FLIGHT, 因為趕到氣咳, 好容易發機瘟, 但最近個SERVICE改左, 今程都係更改後第一次做, 真係好好做喎!!!! 雖然FULL LOAD, 但WITHIN十多分鐘, 咩都攪點晒, 仲有時間食野吹水.......輕輕鬆鬆又一日啦...!!!

久未踏足的黃埔

原定明晚既肥黎生日會(生日快樂!!!)改於今晚舉行, 雖然剛下機有點兒遊魂, 但都好呀....明天放假嘛......而食飯既地點係久違了既黃埔, 我都忘記左對上一次去黃埔的時間!!! 我地去左"鼎泰豐"食飯, d小籠包都okay啦, 但究竟個酸辣湯係"燶"左, 定個味道係咁古怪既呢?!

今個月既roster都少密, 所以趁呢兩day叫okay得閒, 就搵阿強出來飲杯野啦, "你都冇咩變喎!!"..."唔該幫我買fred perry呀"...."冇x冇x冇xx".........

dvd店奇遇記

penang呢班flight係3 day pattern, 所以今日有整整一日慢慢遊!! 起身之後, 個頭都仲少少痛, 所以"攤"左係張床好耐先出動行街; 聽說係penang最有名係dvd, 既新, quality又okay, 個packing都okay, 價錢係平到笑, 所以我揀左一間最大既來行, 點知行行下, suddenly佢落閘, 熄晒燈, 仲要好迅速個種, 心知咩事啦, 就"嘭嘭聲"閃啦, 真係驚佢快到困左自己係入面!!! 出到去之後, 個心真係卜卜跳, 真係前所未有過既經歷.

賓城卡拉ok之旅

賓城Penang首次踏足既地方, 實在係吾知有咩做(除左去沙灘之外), 所以一落機都係跟大隊去食個宵夜先, 個度既環境係一個好似大排檔既地方,好地道, 而d食物都超平好好味, 例如: 蠔仔餅, Asam Laksa, 尤魚, 炒貴习, 燒雞翼, a菜, 等等....我最鍾意都係個drink "桔仔水", 超平only hk$2.4!!! 鍾意裡面粒酸梅!!!

食飽飽之後, 都係跟大隊一起去唱k, 冇錯!! 係penang真係有間加州紅, d歌同香港一樣, 新到連"魚蛋歌"都有, 超勁!!!都okay平呀, 我地貓頭鷹時間都係位位hk$80左右, 大家都玩到high high地, 由於飲左啤酒+香檳+紅酒, 未至於醉, 但wing到個頭好痛呀!!!

英國人都回來了

今早滂沱大雨, 但點都要同阿媽飲茶嘛......落雨都有落雨既好, 起碼飲茶吾駛等位, 人手又充足, service都好d....

Tweeny最近係英國返來定居, 咁當然大家要出來玩下食下啦, 雖然我地只相隔左一個月o者....!!! 十一月好似有多野攪喎....由東京變新加坡?? 我夠竟O吾O呢??

夜晚收到阿強既電話, 佢都係英國返來亦打算係hk搵工, 兩個都返左黎, 下次london flight要同自己玩手指囉~

舊金山圖片分享

GOLDEN GATE





<-CROOKED STREET

-> ALCATRAZ

舊金山

19-22 SEPTEMBER, 2005 溫度: 19度 感覺: 凍到爆

繼ROME之後, 又一個GOLDEN FLIGHT-SAN FRANCISCO!!! 一向我都麻麻地做US FLIGHT, 但三藩市就吾同, 一來較多錢, 二來個度有街行又有好多好多野玩, 上一次四月到SAN FRAN時巳經去左吾少景點, 今次都有再翻遊, 仲去左D新地方添呀.....

• 一抵步巳經要行街啦, GAP竟然ON SALE, 但買吾到野; 行A&F, D TEE好靚但好細件, 幫MINNIE搵衫搵吾到.....其它要搵既都搵到
• 到世界各地既CHINA TOWN梗有越南野食, 仲要係比香港更正宗更好味, 呢度都吾例外, 阿哥帶我地食完後, 仲參觀左一間勁靚LOBBY既酒店, 影D相出來好迷幻, COZ太"幾何"啦!!!
• 呢度既CHINA TOWN超大, 勢力範圍相當大, 隨處都係華人.
• 再一次去CROOKED STREET(Z街), 希望佢可以好似D POSTCARD咁開晒花, 但都係冇既, 呢條街好有型, 係個SLOPE上成一個Z型既街, 真係想試下坐車係個度行既感覺
• FISHERMAN WHARF個度太多野玩啦, 可以遠眺GOLDEN BRIDGE外, 當然狂食SEAFOOD同埋飲CLAM CHOWDER SOUP啦, 好好味!!!
• 天氣實在太凍啦, 自己帶吾夠衫, 頂吾順去左A&F買左件JACKET!! 好好襯呀!!!
• 今次既重點項目係去ALCATRAZ, 呢度係一個小島, 係一個監獄來架, 以前有好多超級重犯係度逃獄而聞名, 電影"ESCAPE FROM ALCATRAZ"同"THE ROCK"都係度拍架, 我去完都勁想睇"THE ROCK石破天驚"!!!!
• 第一次去監獄, 入面好暗黑, 個監倉好細, 但附近係一個絶頂既無敵大海景, 好靚!!!
• 去美國(尤其係SAN FRAN呢間), 行LEVIS係我既指定行程, 因為個邊平D啦, 款又多啦, 而且D SIZE啱我D啦, 又可以好自由咁攞O黎試喎, 佢D LIMITED好靚架, 今次我都買左一條LIMITED, 五百蚊都吾駛, 好開心!!!
• 行APPLE SHOP, 諗住八下D價錢, 好似香港平好多!!
• 遺憾今次冇食CHEESECAKE FACTORY......

CONGRATULATIONS!!

恭喜恭喜!!!! 係呢個人月兩團圓既中秋節, 又一對同學仔結婚呀!!! 恭喜MARI & OSCAR!!!! 抱歉沒有去觀禮; 婚宴上醉左既你都幾攪笑喎.....!! haha

又到十六號 - 煩惱的一天

今日係colombo返來, 又完成左一個通宵班, 加上之前個日晏晝瞓吾到, 所以一落機真係攰到爆炸!!! 剛巧今日又係出roster既日子, 大家又好忙咁swap機呀, 我都"渣渣淋"check呀!!!! 不過一睇, 真係失望呀, 冇靚機!!! 加上traing冇得同同學仔一齊上, 真係"冇陰功"!!! 攪下攪下又四點鐘, 瞓左一陣, 又出去同julie, michelle佢地打邊爐, 我食左好多野呀, 因為呢個係我今日既第一餐.....好恐怖!!!

羅馬圖片分享

<-願望池

鬥獸場

<- 梵諦岡

羅馬遊後記

轉眼間, 6 day pattern既rome就過去, 大部份既時間我都係sight seeing, 因為處處都係影相位, 要記錄的事或風景實在太多, 有機會真係要同大家分享下我d相.....(風景照較多..!!), 係呢度只能好簡單咁記下的軼事......

• 計逗留既時間, 大概整整三日, 但都係陰陰天, 有時仲勁大雨勁閃電, 第一日真係冇mood影相架.....
• 意大利人都okay nice呀, 要問路的話, 佢地都好helpful呀; 個邊d男人仲好高大有型添, 個個都好似足球員咁既樣, 我d同事話如果同意大利人拍拖就開心死, 因為佢地個個都浪漫到暈!!!
• 去羅馬之前, 大家都叮囑我要小心錢財, 因為個邊d小偷好勁好醒好"狼", 咁我都真係好小心, 所以都冇事發生係我身上, 但我周圍望都搵吾到d可疑人物....比我想像中安全得多.....
• 意大利d食物中晒我胃口, 我吾鍾意食米飯架嘛...個邊餐餐pasta真係開心死我, 仲要超級好味, 勁掛住第一天食個個rivioli soup!!!!! 個邊都享受用餐時間, 食一餐都相當費時, 因為每餐都要由頭盤開始->soup->bread->main course->......->cheese->dessert->coffee.......仲之成個business class既flow, 當然每餐梗有wine啦....仲要周圍吹下水咁....都幾開心....
• 我滿懷興奮咁點左cappucino同tiramisu, 但好似冇乜特別, 我以為意大利d會勁好味.....
• 每一日我都有買雪糕食, 實在好rich好好味, 尤其係朱古力味, 簡直係"經典", 價錢又比香港平喎~
• 好開心係個邊搭metro....佢既路線簡單過地鐵...
• 名店街果然名不虛傳, 大部份都係亞洲人, 而個邊d名店不論display or 裝修都靚過人!! 我都好開心咁周圍逛, 仲完成左我既"使命"!!
• 要數景點真係有排講, 但要數最鍾意既....應該係願望池啦..., 個度既環境真係好偉大好浪漫, 吾識點講....去到個度有"嘩!!"一聲既感覺!!!
• 梵諦岡又係必去既地方, 因為佢地話個度係自己一個國家咁計, 所以我都有寄postcard!! 不過後悔冇排隊入museum(太多人啦!!), 冇睇到個幾幅名畫, 下次我會早d去排隊架啦!!!
• 鬥獸場個附近都好精彩, 每對住一個scupture, d人都會翻開本書睇歷史, 對歷史白痴既我, 見得意就影張相咁囉....下次我會準備好少少架啦.....
• 由於電力故障, 所以我等入鬥獸場入面, 但係外面影相都好偉大, 好似postcard咁.....
• ........................

總而言之, 羅馬係一個好地方!!!!

CHAO!!!

長眠過後

長眠十二小時後, 樣子才好翻少少, 不過個人都係累, 冇辨法啦....早上同媽咪飲完茶過後, 又返日文啦, 今日同老師講左好多狗仔既野, 佢隻史納沙真係好醒, 他朝一日, 我都要養一隻芝華華同史納沙....!!!!!!! 之後約左cherrie俾野佢, 不過中間我有數小時空檔, 起初都吾知做咩好, 不過係書店睇下"羅馬書", 飲下野, 係it試下衫(好衝動咁買左), 搵下sd card, 再由尖沙咀慢遊到旺角, 轉下眼我就消磨左個幾個鐘, 行書局永遠係我kill時間既好地方!!!

好攰......

今早原定kul flight cancel左, 換來一班台北turnaround, 雖然錢會賺少左, 但今日係星期日, 晨早返工但下午點半鐘就收得工, 都幾開心架, 而且班flight簡單得多呢, 收左工之後, 我仲可以行街呀.....不過真係feel到好攰, 因為昨晚瞓得四個鐘, 殘得有點可怕!!

小休

呢排好累, 所以瞓極都吾會夠既, 仲要發左一個好辛苦既夢, 攪到起身時都好辛苦.......起身後, 又準備下日文d野, 竟然可以趕及做晒d功課返學; 老師隻史納沙真係好得意, 好想同佢影相, 不過有d吾好意思....哈哈...!!! 佢個樣好似人, 又醒目, 好鍾意.......日本出產既狗真係吾同d?! 上完堂之後, 就去中環報名考能力試, 希望今年okay啦....吾想再衰啦......順道去左zara睇鞋, 因為遲d要"飲", 下個月哥哥又結婚, 我真係要搵一對好少少既鞋, 因為我得d波鞋, 可惜, 睇吾o岩.....點攪?! 晚上, 約左朋友A, F, M飯聚, 去左我好耐都冇去既和民食, 多人多到嘔, 反而峰壽司又冇乜人喎....! 吾同真係驚?!

九月一日 新開始

今天是九月一日, 我真的希望都係我既開學日, 新開始, 呢排好多事真的不太順利, "頭頭碰著黑", 我真係有d介懷, 雖然都係纏繞我一陣, 但有時積埋積埋, 令我都覺得好煩......真係希望九月開始, 大吉大利!!!!!

累極了

可能之前d假期好平均, 每每完左一班flight就梗跟住一日day off, 但呢排個roster係前所未見既緊密, 成日都吾夠瞓, 而且學翻日文之後, d時間真係好似吾夠洗咁....我都覺得自己越來越殘!!!!
今日一落機, 就"嘭嘭聲"返屋企沖涼, 然後又趕去學日文, 其實我真係好累好累, 我都吾知點解仲死撐要返學, 而且明天又要返工喎....攪到我上堂個緊勁辛苦, sensei講咩都冇乜反應, 我對眼根本睇吾到d字囉, 所以sensei都話仲乜讀得咁慢既.......

Perth 柏斯

柏斯係我好想去既一個地方, 因為d雜誌選親十大規劃城市都有佢份, 而且柏斯出名環境好, 相比澳洲其它大城市, 佢係比較寧靜悠遊, 三四天係個度真係舒服到震.....所以呢班flight我都係特登swap返來架......

今次好開心有crew陪我一齊join local tour, 我地揀左一個重點睇wave rock既團(又係我勁想睇既石頭), 一早七點幾pick up, 個團同auckland個個差不多, 又係搭車搭到暈, 冇辨法啦地方大嘛, 車程約四小時(係單程), 沿途經過一個細town-york, 細得好別緻, d屋好田園feel個種囉; 由於我實在太眼瞓啦, 好多時都瞓左覺, 不過沿途既風景都係牧場呀, 羊仔呀, 超級超級大片草原, 柏斯宜家都係冬天尾, 遲少少應該會有花睇, 暫時剩係見到d野花, 同埋一隻巳經開得好勁既黃花, 一大片黃花夾著一大片草原, 黃綠兩隻色夾得好靚!!!(由於係車影, 要放大先睇到效果)

下午約兩點左右到達wave rock既場地, 但先睇一個叫hippo yawn既石, 呢舊石既型態係好似一隻張大口既河馬咁, 正面睇就吾似, 但側側地都okay呀; 跟住行近少少, 就到wave rock啦, 真係聞名不如見面, 之前睇旅遊書張相, 我巳經覺得好勁, 到現瑒仲勁!!! 呢個wave rock既由來, 係由於被風同水沖蝕而形成, 我地爬上去影相扮人地好似滑浪咁, 好攪笑, 大家都影得好開心!! 之後仲可以行高少少, 由上而下咁影, 仲可以遠望附近既全景, 呢d景係邊度搵呀?!

跟住去一個小村食tea, 個guide話個度得十個人住, 裡面有學校, 發電站等等, 只要俾aud$4 便可以有coffee/tea, 同任食佢d cake呀, pastry呀等等, 雖然款式傳統簡單, 但超級好味, 應該係home made, d cream打得勁好味又吾膩, 我地當dinner 係咁食呀!!!

回程又係四個幾鐘, 我梗係瞓啦, 好累!!

紫色炸彈

學完日文之後, 去左annemarie屋企探佢同bb, bb真係變得好快呀, 同剛剛出世時相比, 個樣都吾同啦, 不過bb好攪笑, 成日都想瞓覺, 又成日"O"嘴, 最得意係佢塊"面珠done", 大大下吾知仲有冇呢?! 同annemarie傾左陣計, 就去又一城同嶺南同學食飯, 今晚係要慶祝jaceline生日, "生日快樂!!" 呀....今次同學輝順道俾埋囍帖我地, 佢個個吾係紅色炸彈, 係"紫色炸彈", 因為個信封係紫色, 不過個張封面相真係好靚喎....!!!

P.S. 今日買左after ten隻碟, 可以帶去perth陪我~
"最佳位置".....好!!!!!!

意外的收穫

我的購物症無時無刻都會自動發作, 當我見到o岩心水的東西時, 好容易咁就買左架啦, 吾會考慮下有冇需要呀, 尤其是買衫, 可能我腳大吾鍾意買鞋; 平時都係多穿牛仔褲, 但牛仔褲吾會密密買; 所以好多時就轉移左去買衫買袋, 真係忍吾到, 好弊!!! 我巳經同自己講夏天既衫夠架啦, 吾好再買啦....點知今日買左秋天個d囉.....死未...

為左遲d既Perth同Rome, 我又買左相機囉! 相機其實想買好耐, 不過我都係同自己講, 舊個部都okay呀, 係大左少少o者, 吾需要買住; 但今日無端端又好想買, 咁就去左睇啦, 又買左...!!! 我阿媽係咁"sung yung"我買, 仲話sponsor添....死未...?!

第一天的日文課

很累很累, 很想睡覺, 但要早d起身準備日文課d野, 可惜我既集中力真的有限, 成朝都掛住攪容祖兒隻碟, 所以今日上課既時侯, 真係覺得自己好屎!!! 要好好檢討一下自己的行為!!! 之後自己遊蕩左一陣(當然又係遊書局啦...!!), 要遊到七點meet埋cityu同學仔一齊吃飯; 今日既天氣真係好壞, 好似未停過雨咁, 仲係大雨個種, 地鐵都塞滿了人, 要慢慢排隊先走到出去, 幾誇張!!! 食完個打邊爐, 就過左銅鑼灣"莫"花生, 因為michelle姐生日嘛, 點都要去啤啤佢嘛.....我地都係飲野傾計, 吾會"pack"架, 其實我冇飲啤酒巳經好耐, 係自從大家鍾意去"莫"花生度傾計, 我先飲番咋....! 不過飲酒傾計真係開心架.....

P.S. Happy Birthday ar!!
P.S.S. 鍾意"去火星戀愛"

可侖坡之行

首次踏足位於斯里蘭卡既可侖坡Colombo, 感覺比想像中好, 對於那邊既環境很好奇, 因為我僅知道部份土地曾被海潚摧毀, 而且當地既茶葉很有名; 很想知道來旅遊的話, 會有甚麼好去處?! 原來這兒要看的都是陽光與海灘, 從酒店往外望, 可以看到長長海岸邊, 還有一望無漈既大海, 我懷疑那個是印度洋, 但還未查証, 只有一張照片作留念!!!

P.S. 九月既roster令人振奮, 除了有我至愛既london之外, 還有Rome既出現哦~

我有我的dvd機

為了避免怒瞓到下午三四點, 昨晚我還是較好鬧鐘, 令自己吾好咁過份!!!! 起身之後, 睇翻利物浦對米杜士堡既比賽, 真係慘....零比零!! 跟住要拿起課本啦, 因為今過星期就要上日文堂啦, 不過吾知係我懶定慢, 讀少少都好似要費好多時間, 又分心喎....讀下又攪下其它野, 當中真係發覺好多野都吾記得晒!!! 有d打撃!!!

下午巳經收到明天既duty, 真係早呀...不過都好, 等我有個知字嘛....又可以準備下, 而今程我都未做過:由 HK->BKK->CMB/ CMB->SIN->HKG, 我將會stay colombo, 個度應該冇街行, 又冇電視睇, 所以我新買既dvd player可以出場啦, 超開心!!!

行街行到暈暈地......

今早班機準時八點半到港, 返到屋企都係十點鐘, 沖個涼, 又即刻同屋企人飲茶, 那一刻我係okay架, 只係行路行得慢少少; 飲完茶, 咁梗係要行下街啦, 反正明天又放假!! 漸漸地, 發覺自己去到邊都好凍, 可能真係冇瞓覺所致, 迫於無奈, 四點左右就要收隊返屋企瞓覺!!

p.s. 磯燒雞翼好味呀!!! 所有雞翼人快d試下啦!!
p.s.s. 英超聯開波啦!!! 吾知幾時先可以實現係英國睇波既夢想呢?!

失而復得

今天星期六, 由晚上開始被捉standby, 其實我就一早check左我將被捉去台北, 係晚機去早機返個種, 呢個真係吾錯, 除左賺佢一個星期日之外, 之後還有一日假期, 所以真係"吾該晒!!" 但事情卻有突發性既轉變, 事原briefing完之後, 準備上車到機場前, 我跟另外幾位standby called既同事都被pull out左, 要調往一班去馬尼拉既機, 如果台北跟馬尼拉, 我情願去台北(因為我知loading嘛), 加上明天回程既時間又晏左, 後天既day off仲可能會冇埋!!!! 所以真係十萬個不願, 但當我地係往機場既途中, 司機告訴我地搵吾到個gate, 之後仲話要我地contact 公司, 原來個班機cancel左, 個一刻, 我地三人都吾知點好, 死都吾可以返屋企(因為巳經返左來啦嘛...), 經過一輪交涉後(當中既過程及細節,旁觀者可能很難理解, 所以省略了...), 終於我地三人都好高興可以重返台北個班機呀!!!!

晚上十時之後, 天氣差得很, 雨下得大, 又行雷閃電, 所以很多航機都未能如期起飛, 我地個班都delay左兩小時, 差不多零晨兩點左右才到台北, 吾知點解係都要車我地返酒店, 我沖完個涼食少少野, 又話夠鐘pick up走人啦, 所以都冇瞓過, 真係累到慢幾拍, 好彩loading light得很呢!!!!

p.s. 應該可以寫得好少少, 但頭腦實在亂得很!!!

慢遊曼谷

大清早, 我被捉做一個旅遊嘆世界既flight, 首先坐去曼谷(乜都吾駛做架, 好似乘客一個), 然後下午operate一班機返香港, 聽落好似冇乜野, 好似好嘆咁, 但個transit hour係有成四個鐘, 究竟我地要去邊呢?! 我地心想係機場行下食下, 但公司巳安排好我地返酒店, 俾少少錢我地食野, 於是慢慢嘆左一個lunch buffet, 食完仲有一個party場既karaoke大房俾我地瞓覺休息!! 其實呢個duty都好累, 一來太早起身啦, 坐個程我真係瞓足全程except食早餐, 二來transit hour太長啦, 折磨到吾想做野, 話需我正式operate只係個短短三小時不足, 但我真係由一早五時起身到收工成八點架!!!! 累到震!!

雅加達之旅

八月八日至十日 雅加達 陰天

今天係我第一日既standby, 又係玩九days個種, 一踏正十一時就打來叫我做一個經由sin去雅加達既pattern, 心諗: 如果昨天買到部dvd protable咪好囉(coz 冇貨), 咁去到我就有寄托嘛, 不過好好彩, 女仔始終都係有行街症, 今次又有好幾個crew一齊去mall 行街啦!! 我都係買野食多呀, 例如: 大包細包既breadtalk麵包(細問原來始於雅加達), 千層甜點, 仲有印尼咖啡, 有一隻仲要係人参咖啡, 人参加咖啡, 問你仲駛瞓?! 其實原本諗住留d時間做massage or ear candle架, 不過我地實在係勁呀, 十二點行到七八點, 好似明天吾駛做咁.......所以下次先啦!!

豪涌bbq

今日同edith同埋一班cityu既舊同學燒野食, 雖然我地以前未必係一齊玩個堆, 但大家既樣我係記得, 但名就真係考起啦..!!其實今次join埋一齊玩, 係為左meet一meet阿潤同學既, 呢位後生仔都好厲害喎(佢真係比我後生), 好快就會係英國讀埋個博士學位, 真係學海無涯, 我自愧不如....

今次bbq既地點係豪涌, 我都係第一次來, 個度既格局都好特別, 首先入去既時候要先call佢地(原來之前仲要俾訂金book添呀), 佢就會搵人揸車載我地入去, 而場地你可以揀樹林中或樹林外, 至於用具方面, 係用刀叉瓦碟, 問你試過未, 最勁係洗手間, 有冷氣加抹手紙供應, 基本既麻雀當然有啦, 真係非一般既bbq場!!

終於剪左啦....!!

今日終於同Julie去左中環剪頭髮啦, 雖然剪完冇咩特別, 但係真係舒服左好多囉...洗完頭吾知自己攪吾攪得掂呢?! 之後去左尖沙咀行街街, 一來要去duty free買野, 二來要去facesss行benefit, 之前係outport都有留意呢隻野, 覺得個packing好靚呀, d product都好okay, 原本要買個支遮暇膏, 但冇貨囉......晚上就約左cherrie, christine同肥黎係青衣打羽毛球, 雖然四個人打一個鐘, 但個場係冇冷氣囉, 所以我地都打到好辛苦, d汗係咁流, 對眼睇野曚查查哦~下次點都要book有冷氣既場呀...!!!

P.S. I love your vocab: auncle = auntie + uncle

大昏迷

瞓下瞓下, 起身時原來成四點, 一共瞓左十四個鐘頭, 原定要做既事通通冇做, 都幾恐怖!!!! 食左少少野, 睇翻昨晚利物浦對XXX, 犀利!!! 又係謝拉特!! 每每做完long flight放假冇事做, 爆食症又返來, 加上係vancouver買左吾少薯片(old dutch), 就係咁食食食, 同埋今日發覺自己黑左好多, 可能個日睇parade時暴晒既關係, 佢仲要係加州陽光, d radiation好勁!!

888後感

888又稱"奪命888", 因為呢一個係八日既pattern, 當中要穿州過省, 首先到vancouver, 然後有班shuttle去newyork, 再返回vancouver, 最後返香港. d時差係亂到爆炸, 好難令自己瞓夠返工, 因此好容易會病, 所以有"奪命888"既稱號!! 不過呢八日比我想像中好過, 一來同classmate shannon飛, 二來成set crew都好好呀, 大家日日食下飯, 行下街又一日啦!!!!

今次係我第一次到newyork, 之前其實都好想好想來睇下呢個大蘋果, 好想去睇自由神像同ground zero, 但今次只係留大半日, 所以冇時間 sight seeing, 只能夠行5th avenue, 不過短短時間內都能感受呢個大城市既厲害(d人既service都令我驚, 香港好好多!), newyork比起LA or San Fran真係"美國得多", 不過都開心係度感受一下, 仲有機會搭左一次taxi同metro添呀, 個metro比英國underground焗得多, 個車箱就大d!!

係vancouver既數天, 都係食飯行街, 行街食飯, 差不多日日都有行GAP呀, American Eagle呀, London drugs等等, 係加拿大買minerals & vitamins個ｄ真係又多又平, 所以我都買左不少, 真係睇到你傻食到你傻!! 原來八月一日係加拿大既BC Day, 類似國慶個d呱, 三十一號晚有煙花睇, 但我就冇去到, 但一號佢地個邊就有個Gay Parade, 我同d crew就有去睇, 香港甚至亞洲都好少話會有呢d function, 去到簡直又係大開眼界, 佢地既行為令人佩服!! 其實好多gay都型到爆, 我地都覺得"駛晒"!!!!! 聽說加拿大最近(年尾)將同性戀婚姻合法化, 所以有時係街都見到不少一pair pair呀, 加拿大除了係一個多元文化既城市外, 仲比我想像中開放呀!!!

係呢八日裡面, 真係與世(其實香港o者!!)隔絕, 活到吾知日期時間, 生活秩序亂七八糟, 慶幸我冇homesick又冇病, 同埋有sms呢個發明!!

今年的目標

今日約見左日文老師, 佢好好人呀, 佢有佢既教學計劃, 佢真係希望我學日文之餘, 都要諗下自己其實想點, 訂個目標俾自己, 雖然剩下半年, 但我都有個目標, 希望okay啦!!! 宜家一對一上課, 其實好flexible, 但壓力都大左, 咁我應該會好努力架啦!!!!

之後, 搵左edith食飯, 我地要快d安排走一轉東莞呀!!!! 好緊張好好奇!!!

其實明天要去vancouver, 應該要早d返屋企瞓覺, 但為左見下tweeny夫婦, 再加上佢老公架車, 飲下飲下成兩點先返到屋企, 聽日都有d驚!!!!

悠悠閒閒的一天

可能之前放假放得太耐, 宜家返一兩日工就巳經好累好累, 因為吾係好夠瞓, 呢兩日都只係得五六個鐘!!! 以前我吾太enjoy放星期日, 因為如果行街的話會好多好多人, 多人到你吾想行, 不過氣氛又真係好似熱鬧d, 有人買你又狂買這種衝動!!

• 呢幾天冇乜胃口, 難得難得!!!
• 今日買左支lip gloss, 好開心因為平過日本, 二來佢original既packing係掃來架, 有別於sample個個尖咀!!
• 背痛腰骨痛(coz吾夠瞓), 買到一個好勁既按摩"徐".....吾識寫個hammer
• "香港先生"既節目好攪笑.....點解個大隻佬會輸架....?!
• 要兩杯咖啡先"頂"到今日

遲到驚魂

瞓醒一覺, 又返工啦, 對腳累得吾想行!!! 其實今日係有足夠時間俾我換衫化妝, 但就係講多左一個小電話, 就令我miss左一班車, 要多等20分鐘!! 一上車, 我都冇心機去prepare 呢班機d野, 眼就係咁望住隻錶, 心就係咁叫開快d, 無奈呢個鐘數, 架車要係青衣行多幾個站, 真係好緊張, 因為未試過d時間預得咁緊, 最後.......一下車, 我就飛奔入去report, 其實我 1420要report duty, 當我一"do"卡時...哦...1417....真係驚險...好彩冇遲到...!!!我下次真係吾敢!!!!!!

p.s. 今日班機都好險, 因為delay左一個鐘, 好彩d pax 都好okay, 只係嗌肚餓咋!!!

又開工啦....

今日係長假後第一天上班, 真係要打醒十二分精神, 因為好多時都會有夢遊症....好弊!!
不過打響頭炮做班日本機, 仲要係long stay narita, 又係可以shopping同食野, 我地一行四人玩盡個aeon centre到十點幾, 其實個個都行到好累, 但都撐下去, 除了基本既化妝品店, 超市, 衣服手飾店外, 我地仲去左一間寵物店, 日本既小狗小貓都得意過人!!! 係超可愛, 真係好想帶佢地返屋企, 有一隻芝華華真係好得意, 佢識同你單眼, 個樣又楚楚可憐咁, 吾知運過來hk要額外駛多幾多錢呢???
第二朝早上約九點半左右, 我感覺到張床左右擺動, 應該係小地震, 不過呢d好似平常事!!

就快可以讀書啦....

－＞在果園買的車厘子和士多啤利！！

一早起身, 睇返昨晚利物浦對TNS既賽事, 謝拉特真係犀利, 一出來輕輕鬆鬆就入兩球!!! 之前佢地歐冠個盒帶我都未delete呀, 仲可以翻睇嘛!!! 下午聽收音機講有關搬出來住要注意既地方, 即時又撩起我自住既想法, 可能好多時係外地都慣左一個人住酒店, 某程度上, 有一些習慣都不其然習慣左, 當某些事衝擊我呢d習慣時, 就會好想好想一個人住.......不過我都知道暫時未係時候, 自住要有一翻周詳既計劃！！

我重讀日文既事終於有眉目啦，下星期我就會見到老師啦！！！有時間我都要溫習一下！！

執拾細軟

今日除了好開心咁繼續玩部電話之外, 都開始執拾細軟, 準備遠行, 咁耐冇返工, 真係要讀翻下d書先敢返呀.....不過心情仲未收拾好, 成日都諗返來個幾日點攪好....因為仲有好多野想做.....!!! Thanks for Calling!!! 好開心收到你既電話, 我會好積極編排讀書既野架啦!!!

P.S. Michelle你快d出部機啦, 等你明天同我玩視像電話.

P.S.S. 其實仲有好多相想share, 唯有每日加插下啦...今日有"熊出沒注意"!!! 個熊掌真係好肥好得意!!!!

我有我的羽毛球拍

今日約左朋友cher, 又係唱k加打羽毛球, 好健康既生活呀....而家姐又俾左塊拍我, 吾驚冇拍用呀!! 其實我地兩個好難搵到對手, 因為大家都係玩玩下, d勁人實吾"參"我地玩! 吾知係自己吾夠瞓定乜野, 打羽毛球時真係有d眼花花, 成日都差兩步先到個波位, 加上今日既天氣簡直係吾駛講, 悶熱到令人發瘋, 曬到有個袖印係度....!!

倒數仲有2日要返工

終於換左啦....

今日買左好多東西, 除了買衫及急需既eye gel之外, 終於買左電話啦, 跟住順帶又買埋電話繩呀...!!! 部電話好似好低咁, 除了trade in左部舊機外, 佢又有回贈五百蚊; 宜家smartone吾知擺咩陣, 全部都係企位, 買機你知幾耐架啦, 企定成個鐘都辛苦架嘛....!!!

晚上去左cwb同Michelle & Julie飲野, 個間pub都幾好喎, d花生殻可以隨意拋係地, 想發洩係咁掟人都得!!! 當然係識個個人啦.....傾計地方一流!!!

北海道圖片分享

(上)呢一棵就係係日本廣告界響噹噹既樹


-->除了薰衣草外, 仲有好多好靚既花架!!!










(上)白之戀人朱古力製造工場


<-- 薰衣草的大特寫

<-- 呢張相就獻醜啦....我吾pro影相架嘛....函館夜景

又到十六號

一起身擦好牙,便"bangbang"聲開機check roster, 一看之下....唉...真係又standby, 仲要9days 個隻, 好彩聽到你既話, 心都好過d.....其實好想swap其它機做下, 可惜十六號呢個大日子, 想swap都要俾d耐性, 因為全世界都可能做緊同一樣野.....load得慢係正常, 所以我最終都係放棄左...

今日個頭仲好痛, 之前食既primrose oil都幫吾到我, 仲食到我塊面勁生粒粒, 之後俾左我姐姐...我吾係害佢, 因為佢冇我咁"燥"底!! 問題最後都係自己解決左, 食左幾粒朱古力, 再訓左45分鐘-->好好多!!!

軼事

七月十五日 氣溫=熱辣辣

• 今早起床時很開心, 無它既...哈哈...發夢自己係東京行街, 然後operate班機返-->妄想購物症
• 受到個夢影響, 下午好開心咁讀左課日文
• 定期既頭痛又到, 又要食我d後備panadol
• 無意間發覺部sx813跌至$3180, 有衝動去出機, 阿媽都讚成, 但我冇咁做....!!!
• 晚上冇胃口食飯, 但好有胃口食零食, 於是狂食北海道買的東西
• 妄想症又再度出現-->剛過十二點, 即刻check roster ->邊會咁早呢...?! 傻既...
• 雖然我跟你說很dramatic, 但我信命運, 有時不開心既事會係某一刻會接踵而來, 所以我珍惜我既幸運!!

好多野食呀!!

今日我地嶺南人約左一齊食飯, 順道可以派埋北海道買個d手信, royce有nuts個個朱古力都幾好味喎!!! jacequeline之前到上海旅行, 佢又帶左d上海蟹味既百力滋俾我地食, 個味道好好味呀, 但就食吾出有蟹味!! 不過之前我係香港都買過魚翅味百力滋, 都係一樣冇魚翅味, 但都係好好味道個種囉!!! 原來呢個百力滋系列, 一共有四隻味架!! 但我忘記左啦....除左食之外, "警察"帶左係台灣影既婚紗相俾我地睇, d相好靚呀, 有別於香港影個d, "for example", 相既背景有天空又有草地, 而d post又吾呆滯, 拍得好自然呀, d化妝同衫都吾差, 香港真係影吾到呢d效果, 點知宜家咁多人都去台灣影啦!!!

p.s. 今日食個間星馬野都okay喎, 又平又好味, 下次同朋友食飯都可以去個度!

驚喜一浪接一浪

昨晚同朋友E傾少女心事到三點才睡, 今朝一早又要起身去探Annemarie, 眼袋大到好恐怖!!! 吾想見到自己!!由於吾知生完bb既媽媽可以食d咩, 所以去醫院前, 就不如買d野送俾bb啦....阿Ann媽媽真係好野, 精神超級好, 可以好活潑咁周圍走 真係好似休息幾日就返得工個d, 而bb好可愛呀, 一出世就有個Beckham頭, 個樣真係好似佢Daddy呀!!! 見你餵bb個樣同憶述生仔既過程, 真係覺得母愛既偉大呀!!祝bb快高長大呀!!!

之後, 就同Amy行左一陣cwb, 然後就落旺角先達睇電話, 因為我同佢都好想買三頻&3G電話, 咁做美加機都用得嘛, 本身我就冇乜心水電話, 之前就好like Sharp個部, 不過真係好大舊, 同埋個面成個底咁; Amy就好順利咁買左佢個部心水Sony Ericsson, 買左之後你可以勁做美加機啦!!!哈哈!!

晚上同朋友講電話, 又接獲一個喜訊, 得悉朋友b有bb呀, 真係恭喜恭喜!!!!

BB出世啦!!

今日下午收到annemarie既電話, 原來佢係今早巳經生左baby啦!!! 真係"登"佢高興呀!!! bb比預產期早左幾日出世, 昨晚我都仲見到佢玩緊icq架嘛, 轉眼間就生左啦!!! 咁o岩我明天過開cwb個邊, 咁就順道可以探下佢啦, 究竟佢生完bb要食d咩類型既東西呢? 我都諗緊買咩俾佢食好呀?!!

骨火

今早一起床, 左邊腰骨"尺尺痛", 加上睡眠不足, 全身都吾舒服, 再看臉上的痘痘, 真係吾知發生咩事, 所以整天都係屋企, 睇翻之前錄下的電視劇, pride大結局呀,收拾一下混亂的房間, 仲有分發一下手信, 咁又消磨左一日, 我真係要好好安排一下我餘下十天的假期!!!

北海道之旅的第五天

七月十日 微雨
市政廳 -> JR Tower -> 千歲國際機場

今日係最後一天, 亦都係我最期待既一天, 咁當然吾係想走啦, 而係壓軸既項目"shopping"終於出場!!

市政廳 - 一般既百貨商店都係十時才開門, 所以shopping前,就到市政廳參觀一下, 了解一下北海道既歷史.

->JR Tower - JR Tower其實係全北海道最高既建築物, 以鄰近就係札幌JR火車站, 還有大大小小既百貨公司, 例如: 大丸, Stella Place, Paseo等等, 對面又有loft同東急, 三小時之內一定走不完, 所以之前我做d功課就好大幫助, 因為巳經鎖定晒要買東西既位置, 一解散就好似搵checkpoint咁, 最後, 當然可順利咁買到預定既東西, 不過就冇時間食lunch或到coffee shop抖抖(好想這樣做!!), 只是買了點麵包在車上吃!!

->千歲國際機場 - 最後, 又回來這個小小的機場, 其實細細地都幾好呀, 吾駛周圍做, 過境手續辨好就排另一邊上機啦!! 再見啦, 吾知幾時我會回來呢?!

後記: 雖然很多人都認為北海道既冬天才美, 其實夏天都很不錯呀!!! 真係感受到大自然既利害!! 吃既東西也不錯呀, 如果要買東西, 就真係要回東京呀, 大阪咁.....所以今次既行程, 奇蹟地我有yen剩低呀...連自己也驚嘆!! 我想我一定會回來看北海道既雪景!! 等我呀!!

北海道之旅的第四天

七月九日 晴
小樽商店街 - > 漁民餐 -> 小樽運河 -> 白之戀人-> 狸小路 -> 大通公園+電視塔 -> 明治計時台 -> 薄野

不知不覺, 巳經第四天啦, 導遊希望我地有多d時間行街, 所以就安排早d出發, 因為由函館到小樽, 又係漫漫長路呀...

小樽商店街 - 小樽其實都係我一直想到既地方, 因為好想好想好想去賣音樂盒既水晶音樂城, 不過有少少失望, 因為裡面賣既野麻麻地, 相比往年我係東京自由ga丘個間音樂盒店, 那裡還好得多, 不過來這裡望一望, 我都好開心啦!! 除了水晶音樂城外, 還有好多店好值得逛, 例如北一哨子啦, hello kitty杯cafe啦, letao同六花亭買野食等等!!

->青塚食堂 - 來這裡其實係食一個漁民風味餐, 我地揀左一個魷魚餐同貝仔餐, 另外還點了海膽同蝦刺身食呀, 好好味呀!!

->小樽運河 - 呢一個運河都相當有名, 因為實在美得很, 佢兩旁都有一些油燈, 夜景應該又另一番特色, 而"情書"好多情節都係呢度拍既, 我都仲記得少少!! 除了影相, 當然要食雪糕啦, 因為呢度有一間聞名既雪糕店, 佢出名在味道獨特, 例如: 墨魚味, 海膽味, 啤酒味, 玫瑰花味, 豆腐味, 納豆味, 基本綠茶呀, 桃味佢都有, 我就揀左海膽味同啤酒味, 海膽我就覺得吾太似, 而啤酒味就越食越似!!

-> 白之戀人 - 離開小樽, 便乘車約一小時多往北海道第一大城市札幌. 首到既地方就係"白痴戀人", 呢度好似一個小城堡咁, 每一處都好細緻好靚, 入面除了歷史簡介, 古董杯碟外, 當然吾少得白之戀人朱古力既製作過程. 我最欣賞係佢賣既糖雕塑, 製品有鞋子啦, 公主啦, 婚紗人啦, 花等等, 真係好想買一個走, 但就驚未到香港巳經"散"左, 又驚惹蟻, 最後都係影左張相就算!!

-> 狸小路 - 狸小路就有如香港既女人街, 都係賣下紀念品咁, 所以一解散, 我先到左附近既parco行街街, 忍吾住真係想睇下減價減到有幾平, 都好買到件衫, 平時來日本真係買吾落衫, 因為實在太貴, 減價真係平好多, 行左一陣, 又入返狸小路d藥房買化妝品, 好抵!! 所有貨品七二折!! 始終都係鍾意行街多d!!

-> 大通公園+電視塔 - 看電視時, 覺得大通公園好大好大, 原來實景細好多, 不過這裡又係有名既景點之一. 真係考起, 又係夜景, 影左好幾張都吾得....唯有記起心中啦!!! (一影吾到我就咁同自己講!!)

->明治計時台 - 佢既歷史or起源, 我真係吾記得啦, 只記得我部相機冇電, 偷電咁好快影左一張人地既相o者!!

->薄野 - 薄野係一個不夜天, 即紅燈區, 不過日本既治安我就最放心, 所以逛得夜d都吾驚, 最緊要有店舖開o者!! 係呢個時間(十時多), 都係得一d居酒屋or餐廳有開, 所以我都係行下藥房啦同便利店, 壓軸就係去聞名既"拉麵橫丁"食碗麵啦, 呢條橫丁有七八間拉麵店, 導遊都係建議我地去一d要排隊or擠擁d既店舖食就冇死, 我都係揀左佢suggest個間, 食左一碗麵鼓湯底拉麵同餃子, 好好味呀!!! 夜晚飽到吾想瞓.

北海道之旅的第三天

七月八日 晴
登別地獄谷 -> 果樹園 -> 洞爺湖 -> 熊牧場+昭和新山 -> 白老海鮮市場 -> 紅磚特賣場 -> 函館夜景

今日既行程開始緊湊, 吃完一頓豐富既buffet早餐後, 又展開新一天既行程啦!!

登別地獄谷 - 一踏足此地方便嗅到陣陣既硫磺味, 由於地下既氣溫異常高, 所以形成不斷霧煙既奇景, 附近的溫泉酒店, 大部份都是靠此發熱既地下管以提供熱能.

->果樹園 - 現時北海道盛產既係士多啤利同車厘子, 今次任摘任吃既目標就係佢地啦. 但由於早餐吃得太飽啦, 一時間根本吃不下, 所以我只買下現"成"一小盒吃; 士多啤利就好細粒, 不過都算甜, 而車厘子就又紅又大粒, 車厘子樹仲好靚添呀!!

->洞爺湖 - 宜家諗起呢個地方都好糢糊, 只記得可以望到有珠火山, 個湖一片寧靜, peace!!

->熊牧場+昭和新山 - 有時沿途經過一些山邊, 真係會有一些"熊出沒注意"的告示牌, 咁來到熊牧場就可以親眼睇下d熊仔啦!! 原來d熊個樣都幾可愛架, 個熊掌仲得意, 肥嘟嘟架, 真係好想親手摸下; 據說, d熊bb由於未被馴服, 性情凶猛, 所以要困係個籠到, 佢地d咆哮聲真係嚇到我地卻步; 相反大熊就好好多, 很溫和但超級懶, 有時我地拋塊餅過左少少, 佢都吾願走過少少; 有時見到d熊被我地玩都幾慘, 我地成日都用食物引佢地做動作, 但佢地又食吾到喎!!

昭和新山其實就係熊牧場隔離, 點解佢叫新山呢? 原來昭和新山既形成, 係由於佢旁邊個個有珠火山每爆發一次, 地殼高低既移動, 令呢一塊田(地方)又長高一次, 漸漸形成呢一個山啦!!

->白老海鮮市場 - 其實我地來這個地方係食一個海鮮鍋, 而食堂既樓下係一個海鮮市場, 咁我地可以自行去買海鮮加餸啦!! 由於我吾食蟹既, 所以就冇食呢度最出名既長腳蟹, 不過d蟹真係超級大隻, 個個都要捉住同佢影相, 而我呢就買左自己最鍾意食既海膽, 三文魚同北寄貝刺身, 呢度d海鮮全部都係你自己揀完, 佢即場幫你"劏", 真係好新鮮呀!!! 白老其實係沿海地方, 個海仲要係太平洋, 你話幾偉大呢, 對住個太平洋食海鮮!!

->紅磚特賣場 - 接著, 我地又要趕遠路到函館. 首先要去既係一個叫"紅磚特賣場"既地方, 起初我以為係一些outlet, 諗住執平野既地方, 原來入邊都係賣下紀念品呀, 海鮮呀, 朱古力呀等等, 不過呢度影相真係okay呀, 一來佢每一個house都係紅磚屋, 而且佢附近係一個小碼頭, 環境好浪漫!!

-> 函館夜景 - 吃過晚飯後, 我地就乘吊車上山看夜景呀!! 聽說, 香港既夜景係世界第二大, 而第三大就係函館夜景, 不過導遊指真正既排名其實係: 1st 巴西里約熱內盧 2nd 意大利拿坡里 3rd 香港, anyway呢d野冇得講既, 而上山前, 導遊叫我地吾好同香港個個比較, 要我地看得投入d, 扮d日本人睇得好興奮咁!! 佢都有道理, 香港個個多高樓大廈, 相反函館呢個平d, 感覺好吾同, 不過我睇左好耐都睇吾出佢好似一把扇, 而我既攝影技術又有限, 影左好耐都影吾到個景, 最後買左張明信片留念!!
p.s. 乘吊車途中, 有小煙花加插(花火), 吾知係官方加插還是d人犯法放既呢?? 不過好好睇呀!!!

北海道之旅的第二天

七月七日 陰天
Ken & Mary -> 美瑛花田 -> 富良野 -> 登別溫泉區

一早吃過和式既早餐, 便展開今日既旅程, 由支芴湖乘車到富良野, 需時要四小時, 當中有中途站給大家鬆一鬆, 途中或許小睡或聽導遊講下笑, 佢講野都幾吸引呀, 好pro!

Ken & Mary - 由於車長認為時間許可, 便加插了去Ken & Mary花田, 那裡相當有名, 因為很多日本大公司都會到這兒取景拍廣告, 很多日本人都會花錢一遊這裡, 當中有好幾棵樹都很有名, 都係廣告中出現, 可能我未看過那些廣告, 感受不到那幾棵樹的魔力, 不過環境真的好美, 一片草田, 一望無際.

->美瑛花田 - 吃過午飯後, 便遊覽美瑛花田. 導遊說今年氣溫比往常高, 所以很多花都提早開了, 這兒除了薰衣草外, 還有波斯菊和很多不知名既花, 不過都好靚, 影左好多好多相!!

-> 富良野 - 尚未停車, 我地巳經"嘩嘩"聲, 因為那個薰衣草花田好勁呀, 一大片接一大片花田, 一下車巳經嗅到那陣味, 其實我不太愛這種花(coz討厭紫色), 但就好like佢陣味, 除了吃薰衣草味雪糕外, 還買了很多製品, 例如, 乾花,香薰油, 薰衣草枕頭等等!!! 這裡既花田都大得很, 又要忙於拍照同買野, 有些花田未到便要走了!!

-> 登別溫泉區 - 由富良野到登別又要數小時車程, 好彩那些中途站除了洗手間外, 還有一些店舖賣手信, 所以導遊都話我地犀利, 蔥蔥十分鐘都可以左一袋右一袋!! 晚上入住的溫泉酒店在這區相當有名, 聽說日皇明人都層入住這裡, 不過各方面真的很不錯!! 晚飯過後, 到了附近的溫泉商店街逛逛, 都係買一些紀念品和野食, 好多都有得試食呀...!! 臨睡前, 當然要去浸溫泉啦, 這裡的溫泉以治療功效為主, 有流黃啦, 塩啦等, 可以醫背痛, 肩痛, 高血壓等等, 浸後真的輕鬆晒!!!

北海道之旅的第一天

七月六日 驟雨
香港國際機場 -> 千歲國際機場 -> 支芴湖溫泉區

今天要七時集合, 所以一大清早便出門, 留待機上再睡吧!!

一到達機場, 便見領隊在準備當中, 同一時間, 有四個不同旅行社辨既北海道團, 相當犀利!! 而我團都有三十四人, 大家浩浩蕩蕩出發啦! 今程機咁啱有一空少是我classmate, 不過佢就吾係serve我個邊, 如果係.....哈哈哈!!!

千歲國際機場 - 這是一個很細小的機場, 落機行不到十步, 巳是入境大堂, 所以大家都要擠擁係個airbridge度排隊待辨理手續, 加上日本做事既速度, 辨妥手續加集齊各團友都要花上兩小時多, 不過都冇所謂, 因為第一天都冇行程!!!

-> 支芴湖溫泉區 - 離開機場時巳五時多, 然後便乘車到一個叫支芴湖既溫泉區. 那兒環境相當清幽, 花草樹林, 話晒係第一個景點, 趁未天黑前, 便到湖邊拍照, 不過雨卻很大, 逗留了一會便回酒店等食晚飯.

記得上一次浸溫泉, 巳是兩年前韓國旅行那時了, 所以今次都相當期待. 晚飯過後休息了一會便準備浸溫泉了!! 這酒店的溫泉都相當不錯, 有室內也有露天溫泉, 當然兩個都有試啦, 尤愛露天那個, 一來環境優美, 二來下著毛毛細雨, 感覺很好呀, 再加上露天這個是"美人湯", 浸後皮膚真係滑嘟嘟!! 好開心!!!

羽毛球場上的巧遇

今日約左朋友cher去唱lunch k, 好開心呀...已經有得唱"化蝶"啦, 其實仲有好多新歌, 不過大家都吾識唱, 都係唱翻d舊歌吧!!! 之後就一起去左九公打羽毛球, 去到以為隔離場有排球比賽, 因為有不少人站立觀賞, 又有人拍照, 點到估唔到原來意大利排球隊練波, 佢地都好高大呀, 仲好fit好瘦添呀, 球技一定吾差, 不論開波, "殺"波, 救波等等都好似好好睇咁, 同電視睇比賽真係好吾同呀, 現場快好多, d波"bang bang"聲勁好多!!! 有機會都要試下睇live!!!

明天就要出發去北海道啦, 不過都好煩吾知執咩衫好, 因為個邊好似陰陰天, 得廿度左右, 又要多拎件外套仔囉!!


P.S. 無意間聽到新聞, 述說謝拉特有意離隊, 聽後真係令人沮喪, 希望佢考慮清楚啦!!

大購物前的準備

今次到北海道, 主要目的是賞花, 但對我來說, 購物怎能是其次呢?! 而且日本那邊正值減價季節, 所以趁今日空閒時間, 我就上網搜集資料(比做功課更認真!!!), 一來第一次到北海道, 二來跟團, 購物時間一定有限, 因此事前功夫不能少, 所以我要掌握各大百貨公司的命脈, 這裡要什麼買, 那裡又有什麼賣, 為求以有限既時間走盡各大百貨商店!!! 其實一邊找資料, 自己不其然都很開心, 購物症又翻發了!!!

我常常以為自己的工作沒甚壓力, 假期okay, 又冇"手尾"要跟, 其實可能大都不得了, 因為當我一放假在家時, 就會四處找東西吃(係零食), 可以吃清光, 很恐怖!!

大休前的一班機

我一向都吾"好"做台北機, 因為時間短, 做咩都好急, 有時真係快到吾知自己做緊咩(今天都有類似既情況)...不過因為明天又開始放leave, 所以諗住簡簡單單, "快...靚...正"咁完成大休前的一班機, 如果平時的話, 應該會swap走!!! 今日呢程機, 遇上了一位嶺南的鄰班同學兼同事, 起初第一眼諗吾起, 只是覺得他很面熟, 為了確定自己的想法, 一問之下, 果然是嶺南人呀!! 都幾攪笑!!

p.s. 今天在香港機場巧遇張震嶽, 便服一道, 好有型!!!

化蝶

樓台又架起 含笑洞悉生死 越過另有天地
長眠沒有起 時間若推不翻 就化蝶去遊故地
六呎荒土之下還有你 約定了下世共我更傳奇
最後那一口氣 吐出我當時未講的一句愛你
頓覺遍體輕易會飛

如何回到當時 猶如情侶熱戀的那時
記憶可以 幻作一對蝴蝶飛舞 在時光深處
荼薇紅過都變枯枝 血肉之軀會沒法保持
蝴蝶苦戀花那魂魄也願意

醉酒漢

今早打開報紙一看, 頭條"港龍九霄歷險", 細看之下, 原來有一醉酒漢出手傷人, 並企圖焚燒報紙, 結果, 那人被合力制服, 而客機須轉飛別地方以便調查. 那男子都醉得很可惡, 竟然想在機上玩火, 我本人都十分討厭醉漢, 尤其是那些半醉半醒個d, 以為自己仲好飲得個種!!! 呢類乘客相當騷擾!! 討厭!!

今日閒聊看了兩套電影(vcd) -- the notebook(忘了忘不了) 及 Jet Lag(緣來有轉機) !! 前者都相當okay呀, 雖然未至令人感動流淚, 但故事簡單得來又不俗套, 最適合我呢d吾想用腦既人; 而Jet Lag則係一套法語電影, 我覺得故事有點兒不現實, 但Jean Reno老得來仲好有型呀o下!!

Sydney -> Fish Market

廿六號那天call standby, 被人提早捉去悉尼, 咁即刻"lui飯應",因為這樣就簡簡單單的完成我九天的standby 啦!!!

今次到悉尼, 有幸同d crew一齊去左fish market食海鮮, 原本諗住勁擦海膽, 但不知是否不合時, 竟然冇得賣呀, 不過仲有好多選擇既, 例如食生豪啦, 龍蝦啦, 三文魚啦(超好味!!!!!要俾五粒*****!!!!)等等, 本身我對生豪麻麻地, 但當地既真係好新鮮, 好好味, 仲有試左幾款吾同既生豪, 味道果然不同!!!覺得自己係食家呀.

悉尼那邊正值減價, 但都係冇咩好買, 今次又係買左Starburst-squirts同頭髮野, 仲買左primrose oil tablets調理下....希望有效啦!!

Fund -> FUN?!

不知不覺買了基金巳經一個月, 其實我對於它的起跌還是捉不著, 現在歐元跌, 那些基金還是升, 這就是"趁低吸納"嘛?? 我曾向經紀或一些朋友請教, 可惜還是左耳入右耳出, 我對於這門投資其實興趣不太, 只覺得趁年青受得起風浪, 應該投資一下以備年老所需, 而且基金風險不太, 乃當它儲蓄罷了!!!

有時看見自己的基金不斷上升, 心中真是暗暗歡喜, 尤其愛那"印度股", 當初買入它時巳是高位, 但它仍然有上升的能力!! 好野!!!!

杜拜之旅

由於個tour成四點幾先集合, 所以我地可以抓緊時間行街街!!! 個shopping mall好大好大, 仲有好多遊客添, 要貴要平既brand都有, 有d仲sale, 不過個d衫褲鞋襪, 我又麻麻地, 反而鍾意佢地個邊d古怪擺設!!! 好有型..!

出發啦...出發啦.....我地個個都準備好行裝, 帶備足夠水同濕紙．杜拜那邊正藉係初夏, 但氣溫都有成三十幾度, 到處風沙, 不過感覺都好得意, 完全覺得自己係來旅行.....!! 首先我們乘四驅車向沙漠進發, 我都係第一次坐四驅車, 舒服吾見得但好"豪邁"..哈哈...講下我地要去既呢個魯卜哈利沙漠Rub'al Khali, 原來係世界第三大沙漠, 不過真係好大, 一望無漈, 置身其中真係覺得世界好美妙, d相影出來覺得自己係key上去咁!! 其實係沙漠坐車行走都係活動之一, 因為沙漠高高低低, 要俾我地一個係沙漠"奔馳"既感覺, 說實話, 我吾覺得好刺激, 因為安全帶好緊, 有點兒辛苦, 那種離心力又不及玩跳樓機那種, 不過都係好開心既, 因為大家係架車度亂嗌！！　

在沙漠奔馳過後, 我地就去騎駱駝啦!! 駱駝好大味, 但個樣好得意, 摸個駝峰仲得意, 其實騎駱駝仲好玩, 因為佢地好高大, 當佢起身或坐低時要先屈前膝再到後, 所以自己會有向前衝既傾向, 好似會跌咁!! 之後就係dinner buffet時間, 但當中都有好多野玩呀, 例如: 享受一下阿拉伯式咖啡啦, 劃那些henna tattoo啦, 好靚架, 個女仔吾駛兩分鐘就畫好!! 如果吾係要返工, 就全身都想俾佢畫!!另外, 仲可以試下當地既服裝, 全套衫係黑色, 個頭紗綁好後剩係得對眼個種, 整個ｌｏｏｋ都好好好笑!! 最後就係令大家非常興奮既belly dancing!!!! 一來個dancer好性感, 好身材, 另外, 佢真係扭得好勁, 又係大家亂嗌既時間!!!

整個ｔｏｕｒ就此結束, 其實好值得去呀!! 唯一可惜就係未能目睹那七星級酒店既風采!!

夜遊杜拜

今日第一天開始standy, 仲要星期六, 都預左被人捉返工, 所以好早就著好衫, 油晒顏色, 坐定定係度等電話. 果然好準時, 一夠鐘就有來電話要返工...."登登登".....竟然係去我從未踏足過既中東-->杜拜!!!!!! 那一刻, 真係吾知去杜拜有咩做, 只知個邊係一個新興既旅遊區, 有一間七星級既帆船酒店, 仲有"夜遊杜拜"首歌(但其實都吾知講乜既)......

呢一個四日pattern, 有足夠一天半俾我地自由活動, 我同d同事就join左一個half day tour玩, 超級抵呀....又有discount, 算港幣三百蚊左右.......所以一抵步就訓啦, 準備明天之行...!!

p.s. 間酒店冇得頂, 可以望住街景浸浴架, 其實都少少驚外面會吾會望到入o黎....?!

成功報團...成功XX...

原本都很想去打羽毛球, 但奈何怕趕不及recover, 所以都係放棄左.....不過今日都有好多大事情要幹呀!!! 首先, 當然就係去報名啦, 今日看報紙時竟然被我見到"星晨"仲有北海道直航團, 所以咪勁打去問資料, 順便就報左名啦, 呢個團都好okay呀, 有晒我要去的地方: 富良野, 小樽, 昭和火山等等....好野!!! 攪掂晒....!!!

晚上又係女仔傾計時間, 今晚就約左Edith同埋Phoebe食飯, 當然要update 一下大家既最新情況啦, 她們二人都好似好有目標咁呀(目標都有好多種架....), 好抱歉自己仍是懶懶閒咁樣, 我都吾想架!!!! 我都想好積極, 但真係吾得囉.....!!! 希望下次大家都有突破性的進展!!!!

成功!!!

北海道.....我來啦....!!

今日吾駛返工, 除了要好好休息之外(即係訓個飽!!), 仲要睇下七月份北海道團的資料, 因為好多直航團巳經full左, 真係此料不及, 所以唯有考慮一下轉機團. 其實去北海道, 我真係好想睇花田同埋買音樂盒囉, 今次我要買一個好勁既...即係好靚聲個d.....哈哈!!

Duty Free

轉眼間又十六號, 又係出roster的時候啦, 晚上回家就馬上開機check, 皆因我要睇下幾號開始放第二輪的大假, 然後要安排下月的旅程.....哈哈....

講下今天的工作, 終於..終於到我做duty free啦...仲要係係我毫無準備下做, 即時攪到我"卜卜跳", briefing時個腦係咁回想每一個步驟, 自己又冇帶零錢, 個腦轉得快幾倍呀......好彩, 今日既loading都係..哈哈.....有充裕既時間俾我慢慢做, 加上各位同事既幫忙.....所以都okay呀....

做過一次之後, 真係好好多.....!!!!

長假期後的第一個工作天

完了這個假期, 真係肥左好多, 今天穿制服時真係覺得緊左, 心情即時沉了下來, 不過其實都沒有別的辨法, 但當想起今日要去的是東京和loading的數字,心情立刻好多了!!! 原定今趟要剩袋allowance, 只用上次剩餘千多円, 這當然是沒可能啦, 超級市場的東西真係太吸引啦(係supermarket, 吾係便利店呀...), 連那個"細細粒"玩具都有得賣, 價錢當然比香港...哈!!!!

"電車男"呢套電影係個邊真係好似好勁喎, 行過戲院勁大張poster, 電視又見到那個"秋葉男"; 我睇完本書之後都好想睇埋套戲, 但個邊睇戲原來都幾貴, 要成千八円(差不多百四港元), 咁希望遲d香港都上畫啦!!

下妻物語

今日係最後一天的假期, 轉眼間就這樣結束了十四天的假期, 真的...真的很愉快, 很悠遊!!!
今日和朋友Cher去了apm睇"下妻物語", 對於Lolita的造型真的覺得好好奇, 感覺係lace邊, 大蝴蝶結, "拋拋"裙, 偶爾係街上看見此打扮都會望一眼, 不過呢個造型真係好啱深田恭子囉.......

apm真係好多野食呀, 報紙曾經報導apm既foodcourt到十一時都人頭湧湧, 真係聞名不如見面呀!!

運動後遺症

今早一起床就知不妙, 腰酸痛, 大腿抽搐, 當然是因為昨天運動過度所致. 所以, 今日行動極度不便, 行步路都慢d, 上落樓梯更加吾駛講, 令非常熱衷行街既我都要提早回家休息!!

過兩日都係咁就吾知點開工啦!!

運動日

之前我嘴邊常常都話要做運動, 做gym好, 打波都好, 但都係得個講字!! 回想對上一次做運動既時間, 應該係三月份時係Frankurt, 由於那時正值復活節, 除了餐廳之外, 所有店舖都關門放假, 在冇街行既情況下, 我便和同事係酒店做gym以打發時間.

今日就同朋友Tweeny和家姐d friend一起去打羽毛球,其實我都吾係好識打, 只係有波就追, 有波就打, 毫無技術可言, 我同Tweeny都係想出一身汗, 減下肥肥咁....不過我同佢都好重視呢個約會, 就係打波前勁shopping, 我買左條新既打波褲, 佢就買左褲同羽毛球鞋, 真係連拍都想買埋; 其實我地都係想激勵下自己, 等買齊晒d"架撑", 咁我地就會好努力好努力約去打波...!!!

Tea & Cake

今個和朋友Cher去了一間主打花草茶點的餐廳食TEA,個度有超過五十種既花草茶,而大部份既食物或糕點都加入了花或草,好似之前電視劇個d咁,d茶杯都好靚架....

既然咁特別,我就點左一杯咖啡(應該要試花茶,但我實在心癮發作)和一件薰衣草芝士餅;而朋友Cher就點左薯"容"和一杯花草茶,呢杯茶相當厲害,當中有接骨木花再加吾記得甚麼花和草,對於初患感冒尤其有效,個名仲好特別--體內呵護Internal Care

"唔該俾杯體內呵護我呀!"

當然我地冇咁做啦, 只是手指指這樣子.

一個悠閒的下午

我的假期巳經過了一大半,之前定下要做的事還有很多未做呀....例如: 找牙醫洗牙, 做一場劇烈的運動呀, 剪掉我的爛髮等等.....

今天懶洋洋的, 起床時巳十二點了. 原定下午要好好的讀日文, 但卻分別和朋友P及朋友J閒聊了整個下午!!! 大家談到的都是工作呀, 工作呀, 工作呀, 工作呀, 工作呀, 愛情呀, 愛情呀, 將來呀........在我們這個年紀, 顯然為了工作相當煩惱, 覺得不知如何是好......

我看似沒有甚麼壓力, 但白頭髮卻不知不覺間越來越多.....!!

Tower Bridge

I would like to share some photos here and this is the one I took in London this year.

明目張膽

起初聽呢首歌既時候有冇特別既感覺, 不過聽下聽下, 真係超級愛!!! 聽到我毛管"楝"......

若有　一天公開　明目張膽的愛　
我怕會讓你　太意外　
我的愛　只願縮到最小　彷彿不存在　
就算　我最愛你　情願好好遮蓋　
化作了密碼　不公開　
我一向　都慣自言自語　沒別人愛　
難道你發覺我志在　就會肯滿足這期待　
如若我也有權愛　同樣我也有權不必被愛

好鍾意....

first message

我又開始癲啦......

隨著年紀越來越大, 記憶都越來越差(開始慢三拍個種), 加上本身既工作只需要雙手同把口, 根本吾會有咩文件要處理, 為了記下自己既生活同練字, 所以係呢度開始我新既一頁.

今次應該會好少少, 起碼呢度吾會令人用到"忟"!!!